Ömür qatarı
Gözümdən yuxu kimi ötdü,keçdi bir qatar
Mən necə bu qatarın varlığına inanım?
Qismətim taleyimi eyləyibdir tarimar,
Bu qatara aldanım,bu qatara aldanım?Ürəyimi talayır,gedən qatar həsrəti,
Yandırır vücudumu onsuz keçən anlarım.
Milyonların həmdəmi, milyonların söhbəti,
Bu qatarı aldadım, bu qatara aldanım?
Bir külək kimi əsdin, bir dəniz kimi coşdun,
Ay mənim ən xoş günüm, ay mənim gözəl anım.
Bir durna tək özünü sən bu qatara qoşdun,
Bu qatarı aldadım, bu qatara aldanım?
Uçdun, getdin ömrümdən şirin bir xəyal kimi,
Bilmirəm ki, mən bunu necə anlayım, qanım.
Qalmısan həyatımda cavabsız sual kimi,
Bu qatarı aldadım, bu qatara aldanım?
Bu qar
Yaman səpələnir ömrümə ağ qar,
Bu da sonuncu yaz, sonuncu bahar,
Sən, mən deyilik ki, qardı günahkar,
Qoy yağsın, demə ki boşuna yağır,
Bu qar sevgimizin qışına yağır.Soyudur qəlbimin hərarətini,
Sızladır içimdə məhəbbətimi,
Yad qəlbdə dəfn edib səadətimi,
Uçuq eşq evimin daşına yağır.
Bu qar sevgimizin qışına yağır.
Bitib, tükənibdi sevgi qüdrətim,
Hicranla barışıb acı qismətim,
Yağan qar saf eşqin, saf məhəbbətin,
Gözündə çağlayan yaşına yağır,
Bu qar sevgimizin qışına yağır.
